عالهدا فارس كرم.. شوي شوي!! بقلم : عمري حسنين

بقلم : الاعلامي عمري حسنين

عالهدا فارس كرم.. شوي شوي!!

صحيفة المنتصف

كلنا منعرف انه الفنان اللبناني فارس كرم فنان ناجح وصوته مميز وترك بصمة على الساحة الفنية العربية، وهذه شهادة حق..

لكن من الواضح والواضح جدا انه شخصية حساسة شوي وانفعالية وهذا الشي لمسناه من ردود فعله في الخلافات يلي سمعنا عنها سابقا من خلال اخبار الفن والفنانين.

اغنية فارس كرم “تقبر قلبي” ومقطع “عالهدا” تحديدا عمل ضجة كبيرة وصار ترند عالتيك توك وحقق مشاهدات عالية وتداول كبير على مواقع التواصل الاجتماعي خلال الفترة الماضية، طبعا بعد ما غناها الفنان الفلسطيني الرائع “هيثم جشي” مثلها مثل أي اغنية لأي فنان عربي، لكن الهيثم ترك بصمته عليها مع انها غنية مش جديدة ومن انتاج عام 2006 وهذا الشي اثبتته مواقع التواصل الاجتماعي يلي تداولتها بصوته مش بصوت فارس كرم

الأسبوع الماضي أعلن الفنان فارس كرم عن إطلاق اغنية عالهدا مرة تانية بتوزيع جديد من انتاج روتانا، كيف وليش ومين ما منعرف … وبقول فيها انه من الالفين وستة عم يغني عالهدا!! طيب مين قال غير هيك؟

من رأيي الغنية راح تكون ناجحة اكيد لكن مش بنجاح طريقة فلسطين ولا بعفوية الطريقة الفلسطينية، لأنه اكيد افتعال النجاح بعد النجاح ما راح يكون نجاح

الفنان الفلسطيني هيثم جشي واحد من بين صفوف الفنانين الفلسطينيين يلي يمكن ما سمع عنهم فارس كرم لكن فنهم هو يلي بحكي عنهم، أدائهم الرائع واصواتهم المتينة بتنافس وهذا الشي مابختلفو عليه اثنين والدليل اغنية عالهدا بالتوزيع الجديد

وكلمة أخيرة.. إذا غنية عالهدا بصوت هيثم جشي ممكن يعتبرها البعض ضعف او سرقة ياريت نوجه اصواتنا للفنانين العرب واولهم فارس كرم يلي بغنو أغاني مش الهن او بعملوا الها فويس اوفر بطريقة جديدة وتوزيع جديد

عنا ببلادنا فلسطين فنانين من الطراز الأصيل واصوات تنافس على الصف الأول والواجب افساح المجال لها واعطائها حقها على الساحة لانها تمتلك من مقومات الفن والابداع مايضعها على قمة الهرم.